Styret i OKFH SA, Opplæringskontoret for fiskeri- og havbruksfag i Sogn og Fjordane, har tilsett Bjørn Kvalheim som ny dagleg leiar.
Bjørn Kvalheim er 49 år, født og oppvokst i Måløy. Han jobbar for tiden som salssjef for pelagisk fisk ved Coast Seafood AS i Måløy.
Kvalheim har mange års erfaring frå sal av fisk og fiskeprodukt, og har arbeidd tett opp mot både oppdretts- og fiskerinæringa. Han har og mange års erfaring med arbeid med barn og ungdom gjennom sitt verv som seiltrenar for barne- og ungdomsgruppen i Måløy Seilforening.
OKFH har kontor i Maritim Park på Raudeberg, og arbeidsområdet er heile S&Fj. Kontoret har ca. 50 lærlingar knytte til 9 ulike fag innan kystnæringane i S&Fj. Arbeidet omfattar rekruttering, oppfølging, dokumentasjon og kvalitetssikring av opplæringa i nært samarbeid med medlemsbedriftene, fylkeskommunen og Sjøfartsdirektoratet.
Kvalheim tek over stillinga etter Harald Grotle, som går av med pensjon etter 13 år som dagleg leiar ved OKFH. Kvalheim tek til i jobben 1. januar 2014.
