– Vi har rekordprisar som vi ikkje kan hugse sist vi opplevde, seier Elin Tveit Sveen i Marøy Havbruk.
Tveit Sveen på Svanøy seier dei veldig gjerne skulle ha produsert meir. Førebels er taket for produksjonen nådd. – Skal vi kunne vekse meir no, må styresmaktene gje oss lov til å produsere meir, seier ho til NRK.
– Marknaden der ute skrik etter meir laks, og underdekninga i marknaden er forklaringa på dei høge prisane. Hadde vi fått lov produsere meir laks i Norge, hadde det ikkje vore problem å selje den.
Ola Braanaas i Firda Sjøfarmer starta med oppdrett av laks i 1994, og på dei snart 20 åra han har vore i bransjen kan han ikkje hugse å ha fått over 50 kroner kiloet.
– Eg synest dette er heilt fantastisk. Det er veldig bra at vi har norske bedrifter og ei næring i Norge som gjer det veldig bra, og som ikkje er oljerelatert, seier han.
Forklaringa på dei gode prisane er stor etterspurnad etter norsk laks.
– Dei gode prisane skuldast for det meste ubalanse i marknaden. Det er mykje større etterspurnad enn det vi klarer levere.
– Prisane skuldast også at vi har ei svekka krone som gjer at prisane i eksportmarknaden trekkjer opp, seier Braanaas.
Braanaas veit at mange misunner næringa dei gode tidene.
– Misunninga er ofte sterkare enn kjønnsdrifta, men det viktigaste må vere å gle seg over norske bedrifter som gjer det godt, seier han.
