Han er ny sjef ved Tersan Havyard

Tor Leif Mongstad overleverer stafettpinnen til Leiv Helge Klævold. 

Tersan Havyard entrar ei ny fase med Leiv Helge Klævold som ny direktør ved verftet i Leirvik i ytre Sogn. På same tid som verftet riggar seg for framtida, rettar styret og  organisasjonen ei stor og varm takk til Tor Leif Mongstad for hans mangeårige  og uvurderlege innsats for verftet.  

– Tor Leif har vist eit eksepsjonelt engasjement for Tersan Havyard, og kom tilbake som administrerande direktør då verftet trengde kontinuitet og stabilitet. Vi takkar han hjarteleg for leiarskapen hans, og er glade for at Tersan Havyard framleis vil dra nytte av erfaringa og innsikta hans i styret som rådgivar, uttaler styret i Tersan Havyard.

Omstilling
Mongstad har stått stødig for verftet gjennom viktige og til tider krevjande  omstillingsprosessar, men det er eit verft i god driv, og med høg aktivitet som no vert overlevert til den nye direktøren. Sjølv har Mongstad stor tru på at nysigneringa markerer eit viktig og positivt steg for verftet.  

– Vi er svært fornøgde med å få Leiv Helge med på laget. Eg har stor tru på at  han, med si erfaring, energi og kompetanse, har det rette blikket og innsikta som skal til for å leie verftet vidare, seier Mongstad.  

Verftsindustrien er i stadig endring, og Klævold vil spele ei heilt sentral rolle i å  forme framtida til verftet.  

– Verftets sterke tradisjon, solide eigarar og tydelege ambisjonar for framtida var ein stor inspirasjon for meg. Det var òg ein viktig del av avgjerda om å venda tilbake til Sogn. Eg ser fram til å bli ein del av laget og bidra til å utvikla verftet vidare, seier Leiv Helge Klævold. 

Erfaring
Klævold er opphavleg frå Kyrkjebø og kjem inn med omfattande erfaring frå industri, teknologi, sal og leiing. Han er utdanna elektroingeniør og har hatt ein lang karriere i ABB, der han har hatt fleire sentrale leiarroller. Seinast hadde han rolla som Global Sales Manager for Subsea Power. 

Gjennom karrieren har Klævold òg leidd fleire verksemder i Bergensregionen. Dei siste to åra har han hatt ansvaret for CCB si verkstadsverksemd på Sotra. Under hans leiing har verksemda mellom anna gjennomført sitt største prosjekt til no. Med brei industriell erfaring og eit sterkt engasjement for teknologi og verdiskaping, tek Klævold med seg solid kompetanse inn i ei ny fase for verftet. 

– Det skjer mykje spennande i regionen, og eg meiner verftet har eit svært godt utgangspunkt for vidare utvikling. Det å kunne kome tilbake til Sogn og samtidig få anledning til å bidra til vidare vekst og verdiskaping her, er noko eg verkeleg ser fram til, seier Klævold.

Verftet i Leirvik har vore i drift sidan 1918, og har ein omfattende kunnskap innan leveranse av nybygg uavhengig av design, utrustning, reparasjoner og ombygging av skip.