Witzøe-kontrollert selskap kjøper Salma-merkevaren frå Bremnes Seashore

Bremnes Seashore har inngått avtale om sal av merkevaren SALMA til sjømatkonsernet Insula. Med dette overtek Insula ansvaret for vidare utvikling og distribusjon av ei av  Norges mest kjende merkevarer innan fersk laks. 

– SALMA har vore særs viktig for historia til Bremnes Seashore. Me er stolte over å ha  bygd opp ei merkevare som har sett standarden for kvalitet og ferskheit i den norske  marknaden. Det har vore eit arbeid prega av nytenking, mot og dyktige folk i alle ledd. No er me glade for at SALMA har funne ei ny hamn hos Insula – eit selskap med sterk  merkevarekompetanse, eit solid distribusjonsapparat og ikkje minst flinke og engasjerte  menneske som kjenner bransjen godt, seier konsernsjef i Bremnes Seashore, Linda  Litlekalsøy Aase, i ei pressemelding. 

Insula ser på oppkjøpet som ei moglegheit til å ta vare på og vidareutvikla ei merkevare  med unik posisjon og kvalitet. 

Fyrtårn
– SALMA er eit fyrtårn i norsk sjømatindustri og eit resultat av imponerande  merkevarebygging og produktutvikling gjennom mange år. Me har stor respekt for det  arbeidet Bremnes Seashore har lagt ned, og vil særleg takka Olav Svendsen for hans rolle som gründer og drivkraft bak SALMA. Samstundes ønskjer me å løfta fram innsatsen frå alle menneska som har vore med på å gjera SALMA til det det er i dag – frå produksjon til marknadsføring. Det er med audmjukheit me tek stafettpinnen vidare, og me ser fram til å byggja vidare saman med våre eigne dyktige fagfolk, seier administrerande direktør for Insula Norge, Sigvald Rist. 

Han legg til at Insula, gjennom meir enn 30 års erfaring som leverandør til den norske  forbrukarmarknaden, har sett korleis sterke merkevarer – i kombinasjon med handelen  sine eigne merkevarer – spelar ei viktig rolle i å gjera sjømat attraktiv og relevant for  forbrukarane. 

Insula er 95 prosent eigd av Witzøe-familien sitt investeringsselskap Kverva.

Produksjonen av SALMA-produkta vil i framtida skje hos Insula sitt søsterselskap SalMar. Ambisjonen er at produkta igjen skal vera tilgjengelege i norske  daglegvarebutikkar til hausten.

Merkevare
SALMA vart lansert i 2006 og har sidan etablert seg som eit kvalitetsstempel for fersk laks med ein sterk posisjon i den norske marknaden. Oppkjøpet markerer starten på eit nytt kapittel for merkevaren – med forankring i det beste frå historia og blikket retta mot  framtida. 

– Me har funne den rette til å ta SALMA vidare. Insula har både erfaring, kunnskap og  flinke folk med ekte engasjement for sjømat. Me er trygge på at dei vil vidareutvikla  merkevaren på ein måte som heidrar historia og løftar SALMA vidare inn i framtida,  avsluttar Linda Litlekalsøy Aase. 

Gjennomføring av transaksjonen skjer med forbehold om godkjenning frå relevante  myndigheiter. 

Pareto Securities har vore tilretteleggjar for transaksjonen. Begge partar uttrykkjer stor  tilfredsheit med den profesjonelle prosessen og den gode rådgjevinga gjennom heile  arbeidet.