Prosjektet har vore under planlegging ein periode, og no er det kome så langt at dei har klar ei liste over fiskebåtar som ønskjer å slutte seg til.
Det heile handla i korte trekk om å få til eit samarbeid med oppdrettsselskap i regionen og med lokale fiskebåtar som kan rykke ut på kort varsel dersom det skjer ei rømming. I tillegg samarbeida dei med Værlandet Fiskereiskap for å utvikle effektive fangstreiskapar.
Alle oppdrettsselskap har i utgangspunktet utstyr for gjenfangst, men i regi av dette prosjektet vil ein også få på plass eit system med deponering av utstyr i strategisk plasserte depot.
– Det igjen står nokre detaljar før igangsetting, men vi er einige om at dette er eit prosjekt vi skal etablere, seier Øyvind Kråkås.
Sogn og Sunnfjord
Oppdrettsselskapa som deltek i prosjektet er lokalisert i området frå Førdefjorden til Sognefjorden, og ved hjelp av eit samarbeid med lokale fiskarlag har dei også klart å rekruttere fiskebåtar frå heile regionen som kan vere i rømmingsberedskap.
– Den endelege avtalen er ikkje signert enno, men vi snakkar om båtar av ulik storleik, med ulike drift, slik at ein unngår at alle på lista er indisponerte i same periode, seier Kråkås.
Lokalt initiativ
Kråkås framhevar at tiltaket blir etablert med utgangspunkt i eit regionalt initiativ. Einskildbedrifter har samarbeida med lokale fiskarar tidlegare, men denne gongen deltek dei lokale fiskarlaga i rekruttering av fiskebåtar.
Totalt er det sju oppdrettsselskap som deltek i prosjektet. I tillegg er Fiskarlaget i Askvoll og Fiskarlaget i Solund engasjert, men kor mange båtar som skal delta vil ikkje Kråkås sei noko om før dei endelege kontraktane er signerte.
– Det eg kan sei er at Fiskarlaga har vist eit stort engasjement for å få dette til, seier informasjonssjefen i Salmon Group.
Nina sine herjingar påverka
Initiativet bak etableringa av eit profesjonelt beredskapssamarbeid kom etter at orkanen «Nina» herja lenger sør på Vestlandet i fjor på denne tid. «Nina» medførte ikkje rømming i Sogn og Fjordane, men områda i Hordaland vart hardt ramma, og erfaring tilseier at det kan komme fleire slike stormar.
