«For at oppdrettsnæringen skal være langsiktig og ansvarlig, må velferd og overlevelse lønne seg. Oppdrettere med lav dødelighet bør få mulighet til å utvide, mens de med høy dødelighet må forbedre driften før vekst tillates. Dette vil sikre en sunnere næring og styrke norsk oppdretts omdømme i eksportmarkedene», seier Dyrevernalliansen. Det er vi heilt einige i!
Les også: – Høy dødelighet må ikke lønne seg
Dyrevelferdsmeldinga varslar tydeleg definerte mål for fiskevelferd, med dødelegheit som indikator. Vi forventar at dette viser att i den komande Havbruksmeldinga. Tida er overmoden for å regulere produksjonen etter evna til å ta vare på «husdyret».
Eitt felles regelverk
Trafikklyssystemet har splitta næringa mellom ulike landsdelar. Det blir framleis selt volum utan særvilkår i nord, medan produsentane i vest blir førespegla nye krav for å kunne ta i bruk att det volumet som er konfiskert. Krava går langt utanpå dei som ligg til grunn for sjølve trafikklyset, og som har vore heimel for nedtrekka.
Vi må ha driftsregelverk som er likt for heile landet, og då må lus regulerast gjennom luseforskrifta. Samstundes er lusebehandling sjølvsagt ein stor del av omsynet ti fiskevelferd, og betre førebygging og behandlingspraksis vil bli drive fram gjennom å stille krav til lågare dødelegheit. Difor er dødelegheit det mest veleigna målet å styre veksten i næringa etter.
Vi er glade for at den eksakte grensesettinga no er gjenstand for brei fagleg diskusjon. Dette er komplekse samanhengar, og ein må vere både klok og praktisk med innrettinga.
Støtt opp om det gode arbeidet
Framfor å sjå til det gode arbeidet som blir gjort, og som har ført til at mange aktørar driv godt biologisk også i raude område, har politikarane ein hang til å bygge tunge teoretiske system, meisterplanar som skal løyse alt i ei handvending.
No ser vi til dømes at innsats for miljø og fiskevelferd også blir diskreditert gjennom normprisrådet sin omgang med ASC-sertifiseringa, og då er ein komen heilt på feil fot. Ein må stimulere denne innsatsen og alt arbeid for kontinuerleg forbetring, og ikkje møte det med straffeskatt og hindringar.
Fiskevelferd må styre veksten. Utan god fiskevelferd, har vi ingenting å vise til.
