Utfordrande tider med redusert aktivitetsnivå tyngde ned forskings- og utviklingsavdelinga.
– Det er med tungt hjarte vi må informere om at Akvahub no avsluttar si verksemd, skriv dagleg leiar Trygve Hallberg på Akvahub si Facebook-side.
Meldinga blei lagt ut torsdag, etter det Hallberg beskriv som «ei utfordrande tid med redusert aktivitetsnivå», som har ført til at vidare drift ikkje lenger er mogleg. Selskapet vart meld konkurs 6. november.
Takkar for seg
Akvahub er ei felles forskings- og utviklingsavdeling for verksemder med tilknyting til havbruksnæringa, med hovudkontor i Leirvik i Sogn og Fjordane. Selskapet har eksistert sidan 2016, og hadde aktørar som Bue Salmon og Sulefisk på eigarsida.
I 2023 hadde Akvahub inntekter på 1,5 millionar kroner og eit nettoresultat på i overkant av -1 million kroner. Selskapet sin eigenkapital var ved årsskiftet snaut 400.000 kroner.
No er det altså slutt.
– Vi ønskjer å rette ei oppriktig takk til alle som har samarbeidd med oss gjennom åra. Kvart prosjekt og kvar relasjon har vore verdifull, og vi er takksame for den tilliten vi har fått. Havbruksnæringa er, og vil halde fram med å vere, ei viktig næring for regionen vår. Vi håpar at dei satsingane, erfaringane og relasjonane som er bygde opp, kan komme til nytte i den vidare utviklinga av næringa i åra som kjem, skriv Hallberg på Facebook.
Venta på miljøfleks-avklaring
Hallberg har óg uttalt seg til avisa Firda. Her fortel han at noko av grunnen til at det ikkje gjekk lenger, var uvissa rundt nye regelverk for teknologi i oppdrettsbransjen.
– Vi oppfattar det som at ei ny regulering frå politikarane rundt ny teknologi til oppdrett er etterlengta. Til dømes har eit regleverk for lukka teknologi på land og i vatn for å unngå lakselus og minske forureining latt vente på seg i fleire år. Dette har ført til at både kundane og teknologiutviklarane har måtte vente på kva slags reglar som vil gjelde for desse typane teknologi, seier han til avisa.
Han fortel óg at dei var på jakt etter eit nytt hovudsatsingsområde, men at det har vore vanskeleg å finne ei god rolle.
– Men vi har hatt gode år også, og er stolte av det vi har fått til innan berekraftig havbruk.
